السبت، 30 مايو 2009

مساطيل من يومنا والله ودماغنا مهيسة

فى وسط الاكشن السريع لليوم
تحضر علبة انتينال من الرف الامامى ..
حسام سجل لى العلبة دى ع الجهاز
..قلم ياجماعة..هتاخد من ده كبسولة كل 6 ساعات
يلا يارمضان ..الدلفرى اتأخر
..ديكاديورابولين؟..لا والله للاسف ناقصة من الشركة
دى كارنفيتا فورت ياجماعة..فيتامينات ..مش كونفنتين بتاع الصرع
دكتورة..ابن سينا ع التليفون
..لا الكريم ده خلصان من عندى..هشوفهولك ف الفرع التانى
تركيبة؟..هاتيها يا نشوة اعملها وشوفى انتى الروشتة المعقربة دى
يادى النيلة ..هى سخامة دة اللى فيها الكاميزان ..انا قعدت تلات ايام المرة اللى فاتت ايدى بتوجعنى بعد م عملتها
ايوة ياأميمة..حاضر هديها الحقنة الاول
اللى هتاخد الحقنة تتفضل ف المعمل ياجماعة
حاضر يا حاج هجيبلك المية
طلبية الحادقة يا دكتورة بسمة؟
..
اتسجلت والفاتورة بتتطبع
وتتسرب هى للمعمل خاطفة مكونات التركيبة ف الطريق
تلتقط الجركن الابيض وكوباية المرضى..
تملاها بسلامة نية ..وفى طريقها للخروج
اذا بها ..."انا شميت الريحة دى فين قبل كده"
تقترب بانفها من الكوب ..واذا بحرقان فى مجرى التنفس...
يانهار احوس ..ده ethyl alcohol ..تعود كأن شيئا لم يحدث ..وتستبدلها بكوب ماء
..اتفضل ياوالدى.. بالشفا ان شاء الله
تعود لتعطى الحقنة
تمسك امبولة الحقنة جيدا
وبعد محاولات
ااه..ايدى اتجرحت.. يا نجوى هاتيلى بلاستر من عندك
تعطى الحقنة

كده خلااااااص خلصنا

الف سلامة عليكى
تلتقط انفاسها
ثم...دكتورة؟
لالالالالالالالالا
بريك..بريك.. يانااااااس.....

الجمعة، 29 مايو 2009

تنبيه هام

اللى عاوز ييجى لى ف الحلم يستأذن الاول مش وكالة من غير بوّاب هى ولا مودى تحت امركم تغيريوه كيفما شئتم

الأحد، 17 مايو 2009

رجاءا...

فلتتوقف كلية الهندسة عند امداداتها مشكورة فلقد اتت على الاخضر... ولم يبق سوى اليابس... ولنكتفى بهذا القدر.

الجمعة، 8 مايو 2009

شمس مايو

ها انا على سفح ذاك الجبل
أكد اراكِ تطلين من أعلى بعينيكِ الذهبيتين على استحياء ..كسوف هذا أم ماذا؟
ليس عهدى بكِ فى شهر العظماء
أضاء أول اشعتك وجنتى صغيرتى "ملك" فى اول تجربة لها مع عداد الحياة بأرقام صحيحة
"كل سنة وانتى طيبة ياحبيبة خالتو"
بهرتنا تورتة عيدك حبيبتى تلك التى ضمت مكونات سفينة نوح
وان كنا قد استمتعنا بها أكثر منكِ على الرغم من لهفتك عليها فلكى ان تتعلمى أول دروس حياتك صغيرتى
فظلنا لكى أمتع بكثير من طعم السكر المشغوفة انتِ به
وأمك تخشى عليكِ أضراره ...وان كنتِ لا تكترثى سوى بالاستمتاع اللحظى
شأنكِ شأننا..لا ألوم عليكِ
شمس مايو..
لاتخشى تلك الظلال هناك ..ستنفلق اذا ما أقتربتى
أضيئى وجنتى انا الاخرى يوم عيدى
وكذا أخوتى من العظماء
ولكن اياك أن تضلى وتشرقى من الغرب
.
.
كعادتى كل عام ..أخبرك أننى لست مستعدة الآن